MANLUN LEH MANTUANG TAAZAW TE LEH MANTUONG SUAN,
THANGMANN INNKUAN SUNG THU KUPNA:
A tung aa thu tawh kizui-in 1970 kum, November (1-4) ni dong,
Phaitu Khuo ah, Pu Hang Kin Lun sungkuon teng kikupna kinei hi.
1970-1971 kumsungin, lungtah khuo leh Saalzang khuo te ahzong nikhat tuoh,
Innkuon sung thu kikupna kinei in, a dangnei aa
Committee te deih-na tawh thu-khen-sat nate kinei hi.
COMMITTEES
|
no |
Pan mun |
min |
beh-min |
|
01 |
Chairman |
MANG CIN KHUP |
MANNLUN |
|
02 |
Vice Chairman |
THAWNG CIN MANG |
MANNTUONG |
|
03 |
Vice Chairman |
LUN MIN LIEN MANG |
MANGSON |
|
04 |
Vice Chairman |
SIEN ZA PAU |
HANGVUNG |
|
05 |
Vice Chairman |
LIEN KHO KHAM |
MATMANG |
|
06 |
Vice Chairman |
THANG ZA KHAI |
MILUN |
|
07 |
Secretaries (01) |
LIEN KHAN HAU |
MANNTUONG |
|
08 |
Secretaries (02) |
THANG ZA PAU |
MANNTUONG |
|
09 |
Secretaries (03) |
VIEL KHEN PAU |
MANNTUONG |
|
10 |
Member (01) |
SUOH ZA MANG |
MANNTUONG |
|
11 |
Member (02) |
THANG KHO CIN |
MANNTUONG |
|
12 |
Member (03) |
CIN ZA THANG |
MANNTUONG |
|
13 |
Member (04) |
KHAI CIN THANG |
MANNTUONG |
|
14 |
Member (05) |
CIN ZA MANG |
MANNTUONG |
|
15 |
Member (06) |
MANG KHAN THANG |
MANNTUONG |
|
16 |
Member (07) |
TAWNG CIN LAANG |
MANNTUONG |
|
17 |
Member (08) |
KHAI KHO MANG |
MANGSON |
|
18 |
Member (09) |
SEEL ZA KAM |
MANGSON |
|
19 |
Member (10) |
SUON KHAN THANG |
MANGSON |
|
20 |
Member (11) |
LIEN KHO ZAM |
MANGSON |
|
21 |
Member (12) |
LANGH ZA SUON |
MANGSON |
(A Brief History of Phaitu Village)
Khen Masa ( Part One)
AD. 1583 kum hun pawlin, Pu Hang Ngul tate ahi, Pu Hang Hil, Pu Min Lun leh Ni Tongpi te Unau Bumzaang khuo ah natee’ngton vuhi. Pu Hang Hil in azi masa Pi Mann Nawh tawh, Pu Mann Luna hi, a nei zaw ciengin, Pi Man Nawh, asal/sila (Slave) pa Mi Mang in that hi. Pi, Man Nawh a sizaw ciengin, a naunu Pi,Mang Son, Pu,Hang Vung leh Pu, MatMang, tapasal (4), hingh hiing, hingh neibe kia hi.
Pu Hang Hil in a tate teng anggol, mi leh sa angsuo tah ciengin, aluo di’ngvuh, gam leh lei, mun leh muolte, a ge’lkholsa a om ma bangin, tam bangin, na pulaah hi.tua bang a gam hawmpieh thei na pen, a masa in, Pu Hang Hill eh Pu Mi Lunt e ii a naunu vuh, Ni Tong Pi Khuongnung khuomi Naih Te kici patawh a na kite’nna tung pan aa tambang thu a pieng hi.
AD. 1583 – 1611 kaal hunsungin, khuongnung khuo ah, Thang Sing, Lei Vang leh Naih Te kici Be leh Phung sungte na tee’ngtonin, tua khuo pen, Gui Te Be sung ahi, Nuong Mang in Thang Khal huo panin naga’l – Uh in, seitung siephei nakai hi. Nuong Mang pen, neehsie luo thamlo, khuo dang khat pan aa aga’l – Uh a hi ziehin, khuong Nung khuo a Uh Di’ng, Hausa a se’m di’ngin, Bumzaang khuo aa om, Zo Tulpi nam, milun nam ahi; ka U Hang Hul tate khat vange’n ta vunlen, Hausa se’msah vai aci ciengin, a khuo bupin kithukim ahi manin, Khuongnung khuo Upate, Bumzaang khuo ah, Pu Hang Hil tate khat a nge’n di’ngin, vakuon vuhi.
Bumzaang khuo angtun cieng vun, Pu Hang Hil azi, Pi Manno kuu’ngah, Pu leh Pi aw, Ko’ khuongnung khuo ah, Guite Nuong Mang in, Thang Khal pan, eiga’l Uh pen deihlo kahi manvun, na tate sungpan khat penpen Khuongnung khuo aa, Hausa a se’m di’ngin, ci aa anget ciengvun, Pu Hang Hil in, a tate Uh nading gam a hawm piehsate, Pi Manno@Man Ngeh in, tabang age’n hi. Tuongdaw (Mann Tuong) pen, Seilciem nei Phaitu khuo pan ahizongin, Sondaw (Mang Son) pen, Sinhum nei Gam Ngai khuo pan ahi zongin, Vungdaw (Hang Vung) pen, Muolkawm nei, Khuo Daii khuo pan ahi zongin, a maahaw a Uh nadi’ng gam a kihawm pieh sieng- sa hi; a ciciengin, Mann Lun a nga’p leh amaa thu hi aci cieng in, Khuonung Khuo mite in, Pu Mann Lun Khuongnung khuo aa, Huasa di’ngin, a nalaah mabangvun, Khuongnung khuo ah Huasa nasem suoh hi. Tua bang aa, Hausa a nasep suoh theina zong, a na omsa, Hausa a na se’mpa Nuong Mang tawh, Pilna, Siemna, Hatna, Thuohzawhna tampitah tawh kidem aa, a na guolzaw tahcieng aa, Khuong Nung Khuo ah, Sietung Siephei kai aa, Hausa a na se’m theipan ahi hi.
Nikhat ni hun ciengin, Pu Mann Lun in, Khuong Nung Khuo panin, Bum Zaang khuo aa om anu leh apa tung aa, a lung noplona thu, tam bang in LA khat angphou, angge’n, ang pula’h hi.
: Kat un aw, tun ciin aw e, Naih Te nei suo taaimaw e;
: Ka zuo aw, zuo lun aw e, tembang nongdeih lai hiam aw.
Pu Mann Lun in, anu leh apa tambang aa LA angpaih, angphuo ciengin, anu leh apa in, Aw! I tapa Mann Lun tawh a kinai thei nadi’ng in – ci’n, Bum Zaang khuo pan, Va’ngaLai Khuo hingsa’t in hing – te’ng hi. Tua Va’ng Lai khuo ma ah, Pu Hang Hil si-in, Pu Mann Lun in apa luong, Va’ngLai khuo pan la – in, Khuong Nung khuo ah navui hi.
Pu Hang Hil asi mansang hun in, Pu Mann Tuong in, apa sehsa Phaitu gam a vaan di’ngin, a khuopi a tuipite sung pan in, a khuo suonpi di’ng a muoteng teel in, gam vaan di’ngin a sawl hi.
Phaitu khuo avaan di’ngte pen Pu Mann Tuong in amuon a suon teng ahi.
: Pu, Vum Hul (Lien Zaw te)
: Pu, Thuo Vom (Tung Nung te)
: Pu, Tum Siing (Tai Thul te)
: Pu, Tung Gen (Hang Pa ate) ahi vuh hi.
Pahitu gam avaante, Sielciem zaang tung masa in, tuapna singsie – vum tungin, tuapan Khuainei Baw, tuapan Natang Khailawn panin, Phaitu gamteng alut da’n di’ngvai ngaihsun vuhi. Tua hun laitah in Phaitu gam sung teng pen, gammaang tuulahpi ahi aa, Saai, Zaangsiel, Tawpi(Humpi) te tam mama kici hi. Tua gamvaan te in, Phaitu khuolai ahi; Pu, Sawm Lien (Pa Nang Khan Lien) innsia, Pa Cin Min Thang ( Tu’ laitah,Pa Thang Go Kap) innmai hang laitah ah, SINGMAI mee’t in, Mun natang, na ciemte masa vuhi. Tua MUN laitah TUINEEH, TUIKHUUH na nei vuhi. Kho vaante ahi leh, atungin, Phaitu khuo mun ah, Giephuol na sa’t ngamlo uh hi. A gie phuol masa vu pen, Phaitu khuo nei Siingbuuh lui tung, suongkaw hawm lah aa gieh vuh ahia aa,Siingbuuh luitui a ne’h vuh ahi hi. Tua Siingbu’h lui tung kawl hawm lah pan, su’n lai tengin, innmun di’ngte geel, gamva’t in na’ ase’m let vuhi.
Phaitu gam akisa’t tungin, leitang hoih mama in, Gamphaaipo na Mun ahi na leh, Gammaang Tuu – lah bihbeh ahi zeih in, PHAITU na kici hi. Phaitu khuo a kisa’t tungin, Vanghsing agil kingkeng pen, Sum agolte sangin golzaw lai hi kici hi. Phin-ga pumkhat Pasal te Sakhau sungah thawl z ova-ialo hi kici hi. Tua gamvaan te’n, a maahaw deihna munteng a puo-zaw aseim zaw ciengvun, Va’nglai khuo ah peikia vun, azi atete vuh ha’n in, a gam neipa Pu Maan Tuong kohlo in, atee’ng vuhi. Tuabang ate’nna vuah atate vuh, khol mite’n thepieh paipai vuh ahi ciengin, a ma hawleh a ma haw kihung zolo aa ang op ciengun, a gam neipa Mann Tuong makai na, khuosuon nalo tawh apien theilo lam athei ciengvun, Pu Mann Tuong leh a innkuonpi te vala, vaha’n vun, Pu Mann Tuong in, Uhpi (Hausa) ang se’m suoh hi. Phaitu khuo kisa’t tungin, inn guh (6) pha hi kici hi. Khuo khai Hausa Pu Mann Tuong hun aa kipan Phaitu khuo taa’ngthu kipan hi.
(Laa’mpi La)
A : Sawmtui tungah, ngalpa ba’ng, sou suong ingh, khuo kii’m vakhuoi, ba’ng kasaw, la beita;
B : Khuo kii’m vakhoi, bangsawh ta’ng, he’n bulphu ta’ng, ka sulnaang sa, ba’ng eizui, ngam omlo.
Mann Lun leh Mann Tuong sung, a sanggam tage’l a kilemlo na zieh in, gal leh sa bangin hing om aa, nikhat ni Pu Mann Tuong gam ahi, Sielciem zaang kitu in, Pu Mann Tuong khang (7) na, Pu Tuong Tawng leh Salzaang om Mann Lunt e, kido in Pu Tuong Tawng’ Sielciem zaangah that vuhi. Alu tan in Salaang ah vui vuhi. Nikhat ni ciengin, sanggam nau zawteng ahi; Mang Son, Hang Vung leh Mat Mang sungtengin, lemtuo in, Salzaang Mann Lun te’n, Pu Tuong Tawng luting, puondum khat tawh tuu’n in, Sielpi khat tawh kuosa in Phaitu khuo ah hingvui kia vuhi. Tua bang ang kuon laitah vun, tam bangin LA a phuo vuhi.
A : Khuokii’m lelh Phaitui – pi aw, na tuollai tah aa katha;
B : Amin ka tha PhaiKhuo ah zinba’ng ha’ng, a tunnu’n naubang nasaang, thei nai maw.
Pu Mann Tuong pan kizomsuh in, Tulpi khuokhai Hausa ki – Uhna ( Village Tract) tawh a natawn mabangin, Pu Mann Tuong Pan ki – zom khang (9) na Pu,Khaih Vum in zongh, a Uhna gamsung tengah, miim – sie taangsie a kaihna leh midong te’n, a amm, a enn na thu, tamnbangin, La khat naphuo lai hi.
Pu Khaih Vum La:
A : Ka phung luisuh, zatam aw e, miim leh seitaang ka kaih na;
B : Miim leh sietaang, ka kaihna cieu-lipi tu’ng, siingta’n laa’mba’ng, enng aw e.
Phaitu khuo sa’t-ci’ltung Pu Mann Tuong Uhpi Hausa sep tung aa kipan, khuopi tuipi tea a di’ng aa, spkhietna a ki langhtang zaw deuh teng ensuh kia leih; Pu Mann Tuong pan Khang (7) na Pu Tuong Tawng in, Phaitu gam a hungna tawh, Sielciem zaang laitah aa si-na angtuoh na, a luong tawh a Phaitu mite leh a Phaitu gam aa di’ng aa, si-na ang thuona tea hi zongin, Pu Tuong Tawng in, khuo leh tui, gaal leh sa a nang di’ng leh ata anaute inntuon, khuosuon nate na guon hi. Tua a khuosuon sahte sungah, a tapa (2) na, Pu Neih Le’t khawzaang khuo ah a hi zongin, a (3)na, Pu Vai Vum Tuitum khuo ahizongin, khuokhai hausa in guon hi.
Pu Tuong Tawng tapa, Pu Vai Saa hun ciengin, a tapa, Pu Tuong Seem (Thang Mann Innkuon Haitawipa) zong, Tangh leu khuo ah na inntuon in, khuokhai Hausa nase’m sah hi. Pu VaiSaa in azi Pi Phal Ngul tawh Pu Khaih Vum ang hin, aneih zaw ciengin, Pu Vai Saa sihi. Pu Vai Saa a sizaw ciengin, a tapa Kaih Vum lah naupanglai ahi manin, Pi Phal Ngul in, a pasal Pu Vai Saa mun ah, khuokhai Hausa hingh se’mto hi.
Pi Phal Ngul in khuokhai Hausa a sep hun sungin, Laaitang khuo Hausapa Pu Enn Laang a gamvanna pan, Taasa’t khuo mite’n a tha zieh in, puasuui aa hingpei Taasa’t khuomite (3), Laaitang khuomite’n atha piehna vangin, Laaitang khuo mite leh Taasa’t khuo mite kigaal neina thu hing pieng hi. Athu ah, Nikhatni Laaitang khuo ah, innkhup zu kine’h ni khat, Taasa’t khuo mite (4) puasuui in atung vuhi. Laaitagn khuo mite’n a mahaw tawh kibangin, zu neton, dawnton vuhi. Zu a kha-m tah ciengvun, Pu Enn Laang that in, a lungtang tawh gungal kaai aa, a khuolam, a innlam zuon aa peihna thu, Taasa’t te khat in, tam bangin La khat ahil hi;
Lam Tung kicipa pen, Pahitu khuo ah, a deihdeih in, numei naupang te in, athuoh zolo ahi hi. Lokuon vaitung upite, awkawng, aseeu (Bag) sung longin, amma dieh, Ba’lpi pum tuituoh, Maaipum tuituoh amu leh adeihza laa’h – pieh thei tawntung hi. Pasal thazomte zongh, nuoisie in zawthaw bawl den ahi manin, khuomi te’n Dawi lelh aa anglelh tah ciengin, Phaitu khuo ni-suona hanglam (South) mun ahi, Leisan bawm ke’lsuong-kot mun-ah, nab u-h uh aa, Lam Tung vaikuon angtun, angsuo ciengin, teipi tawh khawlum in a that ta vuhi. Nidang hunciengin, migilo, mi kipausah khat a opleh, “ Na LAM TUNG pau ngam amah” ci-in, THU TAMTUH in, na kinei suohhi. Tam thu tepen, Pi PhalNgul Hausa sep hunsung thu piengte ahi hi.
Pi Phal Ngul in Phaitu khuo Hausa kum (3) sung and sepzaw cieng-in, Pasal Khuokhai Hausa tawhlo,apien theilo tah ciengin, Pi Phal Ngul in a pasal naupa, Pu Neih Let, Phaitu khuo ah ha’nin, a ki te’n pi hi. Tua hun akipan Pu Neih Let in Phaitu khuo Hausa ase’m hi. ( Pu Neih Let pen, azi atate tawh, khuozaang khuo Huasa a seplaitah ahi hi.) Pu Kaih Vum in Zi ang nei ciengdongin, Pu Neih Let in Phaitu khuo Hausa ase’m hi.
Pu Kaih Vum hun in, a gamsungteng, miinsei taangsis kai aa, a khuo atui zongh, gilva ankhawm nuomsa tah a opna vuh ahizongin, khuo dang midang te’n a enn na thu vuh a tung aa a laphuo nate enlei kimu thei hi.
Pu Tuong Za Lien hun ciengin, Pu Enng Seep te-haw tawh, Mawki khuo a vasim vuo, Pu Enng Seep in, a gaalte mi (7) kawikaht aa akawi, amat hun laitah ahi hi. Tua sungah a tapa Seel Let zong, Mawku khuo ah a gaalte’n, thaukaa’ tawh kaplum in asihi.
Pu Khan Thawng pen, a khankum (1891 – 1919) kaal hunsung ahi aa, 1919 kum sungin, Tedim gam sungtengah Zolai kihil tadi’ng ahi ciengin, koikam, kioha’m kizang di’ng cithu, Rev.J.H Cope( Cope Topa) makai in, Tedim gam sung aa om, Hausa Thuneipi teng tawh kikupna kinei hi. Tua kikupna ah, Rev.J.H Cope in, Sizang kam tawh atei, agielsa laimai (20) bang apha, Mangkaang te taa’ngthu “Jack the Gain Killer” a kici khat, hat Lian Bu ci-in, Rev. J.H. Cope in a simsuh hi.
Tua Laisim Bu kibawl na di’ngah, Sizaang kam mitampi in telzolo ahi man-in Tedim kam tawh bawl di’ngin kithukim vuhi. Tua sungah, a thukimpi thudowhpi lah ah, Zo kuol sung thusunna ah, Phaitu khuo Hausa Pu Khna Thawng ahi zongin, Salzaang khuo Hausa Pu Zaang Kho Lien ahi zongin na kihal vuhi. Pu Khan Thawng ahi leh innpipa Hau Cin Khup in, a zata’h mama khat leh amuon asuon mama khat ahi mabangin, 1919 kum tawplam n, khamtung gam Uhpi Milien teng leh (British Government) tawh Yangon khuo ah, kikupna omdi’ng ahi ciengin ci-in, innpipa Hau Cin Khup leh Pu Khan Thawng Yangon ah, Maang Kaang kumpi te tawh va kimu vuhi.tua akimu, a an neehton navuah, Pu Khan Thawng an-nee’h touhkhiel hi, ci-in, a sisa in, a luonghawm beh Phaitu khuo ah a kipuoh hi. Tuabang Pu Khan Thawng asi-na pen, Innpipa in abumlia, a annleh aa guza a khiehpieh hiva ci-in ki-ummaw hi. Pu Khan Thawng aluong a kipuoh na Dolkuong sankingkeng pen, Pi Vung Za Nieng ( a Zi In), tam bangin La a phuoh hi.
A : Zaangdon tuol aa, deih ziingzin aw, tuongtun di’ng, lungsiel maw’ng e;
B : Zaang aa pe’ksi’k, ngo no aw e, Kiengmaang ngul, bang a lupna.
Pu Khan Thawng pen, Zogam bup sung, Hausa sung pan, muon leh suon khat a nahi aa, a khuo atuite thamlo, Zo gambup aa di’ng a na ki piekhie masa pen khatzong ahi hi. A tawp na ah, A khhuo atui aa di’ng leh a Zo gam aa di’ngin, a luong tawh a nalei a na si-pi mikhat ahi ciengin, tam Lai tawh paa’tawi in, a Min kaphat hi.
Gamke’h Mikaangte in , 1896 pan a thugui-hunh bawlvuh “ The Chin Feudalism” Uhpi ngaina tawh ki uhna ahi hi. Tua Uhpi te’n , zmaa Uhna gamtengah, “Sietung Siephei,Salieng Samal, tuatha khaal tha, miim-sie taangsie” akaii vuhi. Phaitu khuo aa di’ngin, seikhaih na tawh ki-uhna a kizom suh diuhdeuh a nukhia pen, 1944 kum cieng ase’m, Pu Thawng Cin Mang hun cieng dong kici thei hi. Bnag ding a heii cileh, Jpan gaal hun siet sungin, Pu Nang Za Mang in, a gam nei Mann Tuong te phalna omlopi, Hausa a sepzieh in, Uhpi Hausa kizopna nawngkai sah hi. Tua tamloh, Pu Thawng Cin Mang in, Hausa se’m ngailo hi a cizong a om hi. Pu Thawng Cin Mang in , apa Pu Lien Za Khup asizaw, 1941 kum pna 1944 kum, Japan gaal hun ciengdong, Phaitu khuo ah Tulpi, Uhpi ki-Uhna tawh Hau sa nase’m ahi hi. Tua Hausa a sepna thu, tam bangin La phuo hi. Pu Thawng Cin Mang La:
A : Va’ngkhuo saaisa, le’nmuol khalta’ng, lungno khuong daii, dam-ah hei-ta’ng e;
B : Lungno khuong daii, dam-ah heita’ng, kawi leh vonlaw, no natuom aw e.
Phaitu khuo ah, 1944 – 1945 kum, Japan gaal hunsiet sungteng in, Pu Nang Za Mang ( Tung Nung ) in, Innpipa Pum Za Mang panpi-na tawh Phaitu khuo ah Hausa nase’m hi. Tua hun laitah pen, Tulpi Uhpi ki-Uhna hun hilai ahi manin, Hausa ase’m ki cikithei tahtah lo hi. Ahi vangin Phaitu hausa gui kizopna ah, ka guong hi( Lai Atapa)
Pu Lien kho Mang in, 1945 – 1948 kum sung, Kawlgam in, suotat – na a nga masang ciengdong, Uhpi ki- Uhna ma tawh hingh- Uh suh hi. Tua Uhpi ki-Uhna tawh a Uh sungin, February 12, 1947 ni aa, Kawlgam sung suotatna nga nadi’ng, Minam makaite zosie thu kimna tawh kibawl “ Pin-Long Thukimna (Pinlong Agreement) pen, Mikaang (Britsih) kumpi te in umzolo ahi manvun, Kawlgam sung om, Minam kim in, a thu-kim tahpi ahi amah, ashsih ahe’i? ci aa a theinop man vun, Manmyo khuo ah, Zum(Office) khat hongin, tua sungah, Thukan di’ngin Mikaang te-in a muonpen Minam makaiite mi (8) thukan di’ngin ateel vuhi. Tua thukn, Minam Makai te-in (1947, April 19 – 24) kaalsung, thukanna nei-in, British Mikaang kumpite tungah, amuna bangvun apuoh (report) kia vuhi. Tua bang aa amaa-haw mu-na leh a thupuoh (report) na tu’ngtawn in, Kawlgam in suotatna anga thei pan ahi hi. Tua thukan te lah ah, na ki pawlpi teng tawh gop-in, “ZOGAMSUNG THU MAKAI” (CHIN POLITICLA LEADERS) te lah ah, “Zo Minam Ni, Golden Jubilee Pawibawl ni cieng aa, PA’TAWI-NA a kipie di’ngte a dangnei aa bang teng ahi hi.
CHIN POLITICAL LEADERS
Chin National Day, GOLDEN JUBILEE PAWI BAWL NI CIENG AA, PA’ TAWI-NA A KI PIE DING TENG.
Representation of The Masses for Rees William Commission for Frontier Areas Committee of Enquiry (1947 – April, 19 – 24)
- U Lien Kho Mang – Tedim (Phaitu)
- U Vawmthu Moung – Mindat
- Capt. Mang Tung Nung – Tedim
- Subedar Thang Za Kai – Tedim
- Headman Thawng Hang – Tedim
- U Thang Kho Kai – Tedim
- U On Kho Mang – Tedim
- U Let Suoh – Tedim
Pu Lien Kho Mang in tambang aa, Kawlgam suotat nadi’ng aa, Mikaang (Bristish) te ii muon leh suon, gam makai khat aa a na opthei na thete thamlo, Khamtung gambup, Zo Minam Ni( Chin National Day) apien khiet nadi’ng aa, a vaihawmpi U Vawmthu Moung leh
Capt. Mang Tung Nung te tawh kithuoton in, mapanton nate nanei hi. 1948 February (20) ni ciengin, “ Zo Minam Ni” (Chin National Day) ki kipsah in, Zogam buppi Democracy nga hi, “The Cin Hills Regulation Acts” deihna tawh ki-Uhna “Feudalism” Uhpi ki-Uhna ahi, “Sietung Siepheei, Salieng Samal, Tuatha Khaaltha, peih di’ngte a tawpni, Nidang Gambup ki-Uhna ahi” Hausa,za ciengin, Uhpite, Vuondahte, Maangpite, Menzite” cibang aa ki-Uhna te zosie atawpni, a deihdeih in, Tedim gamah, Hau Cin Khup, Pum Za Mang te ii Siekaih a tawpni ahi hi. Ih Zo gam ah, Democracy tawh ki-Uh thei na-di’ngin, “ Chin Special Division Acts” kibawl in, tua ki-Uhna tawh, ki-uh tosuoh hi.
Zo mite suotatna a nga thei nadi’ng aa, a lamkaii aa, Zo Minam Ni kibawlna pan aa Phaitu khuo ah Pu Lien Kho Mang angtun ni’n, Khuo leh Tui, kilungdam luo ahi manin, Hausapa Pu Lien Kho Mang inn ah, khuopi tuipi te in, lungdamin zu leh sa tawh pawi kibawl hi. Tua pawi ki bawlna ah, Laphuo siempa Pu Neng Laang in, Pu Lien Kho Mang @ Thawng Khen Thang Pa, tambang in, La natap hi.
Theibagn se’n aa cinth le’lsiem, khaw-mazap siel-lo zu’nba’ng, tu’n hingzo pan e, tu’n hingzo pan e;
Tu’n hinzo pan, va’ngkhuo guol aw, cinthu le’lsiem ga-mung ba’ng, khauhma civai e, khuahma civai e.
1945 kum tawplam Japan gaal ven patlam in, Mangkaang galkap a lamsamh pawlkat Pu Lien Kho Mang in India gam, Imphal ( Phaipi Khuo) British Army Head Quarters munah a vapuohpieh na va’ngin, Mang Kaang (British) kimpi te’n, Minphatna a peih ba’nvuah, 1954 kum hun ciengin, Minphat Va’ngpiehna ci-in, Sai Thau Lawng Khat leh Ngun naa’m sau khat zong, napie uh ahi manin, tua Saaithau leh, Ngun naa’m sau kinga ni’n, lung dampina pawi kibawlin, tua pawi sungah, atupa Pu Thang Doh Lien @ Doh Kaii ( LienZaw) in, tam bangin, phatna La, na phuo hi.
Theibang se’n aa, guol hiembang-gawi, gawilungtunglo, naa’mtem-hiem ne’lkaai, naa’mtem-hiem ne’lkaai;
Gawi lungunglo, hauhta min pauhna, lungdeih suoi ne’lkaa, lungeih suoi ne’lkaai.
Pu Lien Kho Mang vaihawm siemna tawh, Phaitu khuo in Zothau tampi a kinga la la zong, Pu Doh Kaii in, tam bangin La naphuo lai hi.
Thawng Khen Thang pa, ziingvai banghawm, seim ee kawlcieng thang, deih teng pom tai e, deihteng pom tai e;
Nang Za Mang zing, vaibang hawm-in, zaangkhen khawlcieng in, vai-mang lai zuon e, vaimang lai zuon e.
Kawlgam in suotatna aki ngazaw hunsung ahi; 1948 – 1955 sung, Pu Lien Kho Mang in Hausa se’msuoh hi.
Tua hun sungpen, Phah-Sah-Pah-Lah hunsung ahi aa, U Nuh in, Kumpi (Prime Minister) asep hun-sungzong ahi hi. Tua hunlai in, Khuo (4)/Khuo(5) khaw’h khat in kikoih aa, tua khaw’h khat pen Circle Chairman khat in n a uh hi.
Pu Lien Kho Mang in, Phaitu pan Lungtah, Khamzaang, Gelmuol, Khuomun te na-Uh hi.
1951 kum, Phaitu –Tonzaang Mawtaw lam kilai pen 1953 kum ciengin kizo aa,
tua lampi pen Lien Kho Mang lampi na kici hi.
1946 - Pu Hat Go lamkai in, Tedim Nelson Topa kung ah, Phaitu khua -private primary school na ngen vuh hi.1949 - Phaitu khua ah grade 7 (Private Middle School) na ki hong ta hi.Tua kumsung ma-in UNICEF (United Nation’s Children’s Foundation) pan hu-na TUIZAWL kinga hi.
(Ref:Phaitu ZBA tangthu ciepte na pan)
1996 kum, Pa Thang Lien Kap (Tung Nung) in, Hausa asep hunsung in,(Affilated Middle School) na kinga hi.
1998 kum, Pa Khup Kho Pau ( Mann Tuong) in, Hausa a sep hunsung in, Tuisawm luipan, Hydro Electric Power kinga hi. Tonzaang khuo bup tawh kibangin, Phaitu khuo in, Mei kinga hi. Mei nataang hi.
NB: “Ciemte di’ng aa kilawm, Hausa a dangzong omlai di’ng hi. Hizong leh Laigielpa theiteng ahiaa, a kisam lai a op leh, laibu bawlkia ciengin, a kim aa I bawlzawh na di’ngin ei panpi ciet tavun, ci’n kang thu’m hi.
Source: Kam Cin Pau (USA)
Kyat Exchange Rate
0 comments:
Post a Comment